ជនសង្ស័យម្នាក់ត្រូវនគរបាលចាប់ខ្លួនបន្ទាប់ពីជិះកង់ចូលលួចម៉ូតូនៅស្រុកអង្គស្នួល
27-August-2018 | ដោយ ពលមនសិការ
កណ្ដាល៖ នគរបាលចាប់ខ្លួនជនសង្ស័យម្នាក់ បន្ទាប់ពីជនសង្ស័យខាងលើបានជិះកង់របស់ខ្លួន រួចចូលលួចម៉ូតូ តែត្រូវម្ចាស់ម៉ូតូឃើញទាន់ផ្អើលឆោរដល់ប្រជាពលរដ្ឋជួយពួនស្ទាក់រហូតចាប់ខ្លួនជនសង្ស័យប្រគល់ឲ្យសមត្ថកិច្ច។ករណីលួចម៉ូតូខាងលើនេះ បានកើតឡើងកាលពីវេលាម៉ោង១៤និង១៥នាទី ថ្ងៃទី២៦ ខែសីហា ឆ្នាំ២០១៨ ត្រង់ចំណុចការដ្ឋានគ្រឿងចក្រ ស្ថិតក្នុងភូមិត្រពាំងពើក ឃុំពើក ស្រុកអង្គស្នួល ខេត្តកណ្តាល ។
មន្ដ្រីនគរបាលស្រុកអង្គស្នួលបានឲ្យដឹងថា ជនសង្ស័យចាប់ខ្លួនបានមានឈ្មោះ លី ស្រ៊ុល ភេទប្រុស អាយុ១៨ឆ្នាំ មុខរបរមិនពិតប្រាកដ មានទីលំនៅភូមិរោង ឃុំចាម ស្រុកកំពង់ត្របែក ខេត្តព្រៃវែង។ ចំណែកជនរងគ្រោះឈ្មោះ សឿន គង់ ភេទប្រុស អាយុ៣៧ឆ្នាំ ជនជាតិខ្មែរ មុខរបរអ្នកយាមការដ្ឋាន មានទីលំនៅភូមិចំការជោ ឃុំពើក ស្រុកអង្គស្នួល ខេត្ត
កណ្តាល។ ដោយឡែកវត្ថុតាងដកហូតបានមកវិញម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខភ្នំពេញ1BR-9870 លេខតួនិងលេខម៉ាស៊ីន 9806549 ជារបស់ជនរងគ្រោះ និងកង់១គ្រឿង តួស្រី ពណ៌ទឹកប្រាក់ជារបស់ជនសង្ស័យ ។
ប្រភពដដែលបន្ដថា នៅមុនពេលកើតហេតុជនរងគ្រោះជាម្ចាស់ម៉ូតូបានជិះម៉ូតូរបស់ខ្លួនមកទុកនៅខាងលិចរោងការដ្ឋានដែលខ្លួនយាមប្រហែល១០ម៉ែត្រ រួចដើរចូលទៅក្នុងរោងការដ្ឋានដើម្បីបំពេរកូនឲ្យដេកខណៈនោះស្រាប់តែជនសង្ស័យខាងលើពុំដឹងជាជិះកង់មកពីណាបានឃើញម៉ូតូរបស់ជនរងគ្រោះទុកចោលដោយមានជាប់សោរផងនោះក៏ទុកកង់របស់ខ្លួនចោលរួចធ្វើសកម្មភាពលួចយកម៉ូតូរបស់ជនរងគ្រោះជិះចេញទៅក្រៅ ភ្លាមនោះស្រាប់ឈ្មោះ សុង ចាន់ថន ភេទប្រុស ដែលកំពុងអាំងខ្យងនៅក្បែនោះ បានឃើញជនសង្ស័យខាងលើជិះម៉ូតូជនសង្ស័យក៏ស្រែកថា ចោរៗ រួចក៏នាំគ្នាជិះម៉ូតូដេញតាមជនសង្ស័យ រហូតមកដល់ផ្សារថ្នល់ទទឹង ធ្វើឲ្យមានការភ្ញាក់ផ្អើលដល់ប្រជាពលរដ្ឋ ក៏នាំគ្នាពួនស្ទាក់ចាប់ខ្លួនជនសង្ស័យ ហើយត្រូវប្រជាពលរដ្ឋនាំគ្នាព្រួតវាយលើជនសង្ស័យ បណ្តាលឲ្យយបែកក្បាលដេរចំនួន០៥ថ្នេរ រួចទើបប្រគល់ឲ្យសមត្ថកិច្ច ។
នៅចំពោះមុខសមត្ថកិច្ច ជនសង្ស័យសារភាពថាខ្លួនបានជិះកង់រហូតមកដល់ក្បែការដ្ឋានស្រាប់តែឃើញម៉ូតូរបស់ជនរងគ្រោះទុកក្បែរោង ទើបខ្លួនដើរចូលទៅ ហើយឃើញសោរជាប់នឹងម៉ូតូស្រាប់ក៏លួចម៉ូតូជិះចេញទៅក្រៅតែម្ដងទៅ ។ ចំពោះករណីនេះ សមត្ថកិច្ចជំនាញកំពុងកសាងសំណុំរឿងចាត់ការតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ3431
- ម្សិលមិញ16391
- សប្តាហ៍នេះ49661
- ខែនេះ164811
- ឆ្នាំនេះ164811
- សរុប20607267